«SOS Астана» балалар ауылы мен Жасөспірімдер үйінің 20 шақты тәрбиеленушісі «ҚТЖ» ҰК» АҚ бас ғимаратындағы Орталық мұражайға экскурсияға келді. «Дара» қайырымдылық қоры мен «Қазкөліккәсіп» ҚБ бірлесе ұйымдастырған экскурсия барысында олар 37-қабаттағы «Қысқы бақты» да тамашалап, кәсіподақ атынан сыйлықтарға ие болды.
Аталған қордың «Тәлімгерлер» жобасының үйлестірушісі Бекназар Қазиевтің айтуынша, қорда республика бойынша 15
қалада өз еркімен сынақтан өтіп, іріктеліп алынған 200-ден астам тәлімгер бар, соның екеуі – ҚТЖ қызметкерлері. Олардың басты мақсаты – балаларды әлеуметтендіру, үлкен өмірге дайындау.
– Қазақстан теміржолының музейін көруге шақырғанда бірден келістік, балалар болат жолдың қыр-сырымен танысып, жанжақты дамысын дедік. Теміржолшы мамандығын толығырақ білсін дедік. Мүмкін араларынан болашақ теміржолшы шығып қалар. Мұнда балалардың тәлімгерлері еріп келді. Соның ішінде Данияр мен Нұрлан – теміржолшы тәлімгерлер, – дейді Б.Қазиев.
Музей менеджері Ақмарал Молдашева балаларға мұражайды аралатып, әрбір экспонаттың тарихымен таныстырды. Осы сәтті пайдаланып, екі теміржолшы тәлімгермен тілдестік. Солардың бірі – Данияр Омаров ұлттық компанияның «Ірі жобалар бойынша дирекциясы» филиалының құқықтық мәселелер жөніндегі бас менеджері қызметінде.
– «Дара» қорының «Тәлімгерлер» жобасына 2022 жылы мамыр айында өттім. Менің шәкіртім – елордадағы «SOS Астана» балалар ауылының тәрбиеленушісі, 16 жастағы Владимир. Бізге жоба бойынша баланы өздері таңдап береді. Бір қарағанда Вованың мінезі, болмысы өзіме ұқсайды. Қордың психолог мамандары соған мән берген секілді. Жалпы жоба бойынша 11 жастан жоғары балаларға тәлімгерлік етуге рұқсат етіледі. Біздің келісімшарт бойынша міндетіміз – бұл баламен әр жексенбі сайын таңертең сағат 11.00-ден кешкі 18.00-ге дейін кездесу, бір жерге бару, жалпы бірге уақыт өткізу. Өзімнің 4 балам бар, жасым 35-те. Дегенмен мен Вовамен кездесуге қашан да уақыт табамын, – дейді Данияр.
Жоба мақсаты – баланы әлеуметтендіру, қоғамға бейімдеу болғандықтан тәлімгерлер оларға базар мен дүкендерде қалай сауда жасау керектігін, күнделікті тұрмыста кездесетін мәселелерді қалай шешуге болатынын, қоғамда тағы қандай жағдайлармен ұшырасу мүмкіндігін ертіп жүріп көрсетіп, түсіндіреді, ақыл-кеңесін береді.
Киноға, кафеге, көрмеге баруға, жағалауда серуендеуге, жазда бірге көлге түсуге болады. Жүзбе-жүз кездеспесе де телефон мен ватсап арқылы балалар тәлімгерінен ақыл-кеңес сұрап тұрады. Бірақ қамқорлық танытамын деп оларға қымбат зат алып беруге, қымбат қызмет көрсетуге болмайды. Біраз уақыт өте келе тәлімгер баланы өз отбасымен таныстырып, үйіне шақыра алады.
Екінші тәлімгер Нұрлан Дүйсенов «ҚТЖ-Жүк тасымалы» ЖШС ішкі бақылаудағы тәуекелдерді басқару саласында қызмет етеді.
– Бұл жобада екі жылдан бері жүрмін. Менің қамқорлығымдағы 13 жасар Ислам алғаш танысқанда өте ұяң, ашылып сөйлемейтін бала болды. Себебі олар көбіне қоғамға бейімделмеген. Мектеп пен балалар ауылының арасында үнемі бақылауда болады. Сондықтан мен оны күнделікті өзім баратын жерлерге апарамын. Тіпті кейде көлік бұзылып қалса, соны жөндеуге барғанда көре берсін деп ертіп барамын. Одан бөлек екеуміз ақылдаса отырып, басқа да жерлерге барамыз, –
дейді Нұрлан.
Райхан РАХМЕТОВА,
Астана
Суретті түсірген
Александр ЖАБЧУК
