Бастауыш кәсіподақ ұйымдарының ұйымдастыруымен қолға алынған спорттық сайыс аймақ бойынша ең кемі тораптық үш станцияда өткізілмек.
Бүгінде Сексеуіл және Қазалы станцияларында үздіктерді анықтап, ең мықты деген ойыншыға берілетін жолдаманы сарапқа салып үлгерді. Яғни Сексеуіл торабында өткен турнирде Сексеуіл локомотив пайдалану депосының қызметкері, «ТЧЭ-36» командасының мүшесі Рақымжан Құлжанов пен Сексеуіл жол дистанциясының қызметкері, «ПЧ-59» құрамасының ойыншысы Аманжол Құлжанов жеңіс тұғырына көтерілген болатын. Жалпы бильярд ойыны қолына кий ұстаған кез-келген адам ойнап кете беретін ойын емес. Оған ерекше икем мен шеберлік керек. Техникалық, геометриялық дайындық, философиялық жігер, математикалық дәлдікті қажет ететін ойын түрін тәп-тәуір меңгерген теміржолшылар аймақта жетерлік екеніне турнир барысында көз жеткіздік.
Салалық турнирдің Қазалы станциясындағы додасына 4 құрама команданың теміржолшылары қатысып, мұнда да үздіктерді анықтау үшін қызу ойын болды. Турнирге Қазалы вагон пайдалану депосының «ВЧД-6», Қазалы белгі беру және байланыс дистанциясының «ШЧ-40», Қазалы жол дистанциясының «ПЧ-60», Қазалы электрмен жабдықтау дистанциясының «ЭЧ26» құрама командалары қатысты. Жүлделі 1-орынды Қазалы белгі беру және байланыс дистанциясының инженер-экологы Қуандық Төлемісов иеленді. 2-орынды Электрмен жабдықтау дистанциясының электромонтері Мейрамбек Ағасылов жеңіп алды. 3-орын Жол дистанциясының инженері Нұрлан Тағыбергенге тиесілі болды.
– Жүлделі үш орынға да бағалы сыйлықтар мен дипломдар табысталды және басқа командаларды да ескерусіз қалдырмай, жұбаныш сыйлықтар берілді, – дейді Қазалы жол дистанциясы кәсіподақ ұйымының төрағасы Дастан Әбішев.
Сабырхан Сейілбекұлы
