Қазақстан темір жолының 120 жылдық мерейтойына орай Абай еліндегі Жаңа-Семей жол дистанциясы желі бойындағы өз теміржолшыларының арасында
шағын футболдан сайыс өткізді
Семей ЖТ бөлімшесінің Жаңғызтөбе станциясында өткен жарысқа жалпы саны 35 адамнан тұратын төрт команда қатысты. Атап айтсақ, үш бірдей өндірістік учаске жолшылары мен көршілес «Досжан темір жолы» қызметкерлері келіп, өзара шеберлік сынасты.
Жаңа-Семей жол дистанциясының бастығы Қанат Әбдуғалиев пен ПЧ-40 кәсіподақ ұйымының төрайымы Зульфия Еникеева сайыс алдында лебіз білдіріп, жолшыларға жеңіс жолында сәттілік тіледі.
Сайысқа қатысқан жолшылардың ешқайсысы осал емес, Семей мен Аягөзде өткізілетін түрлі спорт сайыстарында команда намысын қорғап жүрген спортшы жігіттер болатын.
Бір-бірінің әдіс-айласын, қыр-сырын білетіндіктен ойын барысы мейлінше тартысты әрі шиеленісті түрде өрбіді. Әйтсе де, ақтық сынға тек мықтылар ғана ілікті.
Финалдық сайыстың қорытындысы бой ынша Жарма және Жаңғызтөбе станцияларында қызмет көрсететін үшінші учаскенің жолшылары бірінші орынды жеңіп алды. Екінші орынды Досжан темір жолының жігіттері иеленсе, үшінші орынды №1 Жаңа-Семей телімінің жолшылары алды.
Барлық жеңімпаз командаларға жеңіс кубоктары, дипломдар мен ПЧ-40 кәсіподақ ұйымының тарапынан әзірленген бағалы сыйлықтар табыс етілді.
Ал Жаңа-Семей жол дистанциясының бастығы Қанат Рысқалиұлы өз атынан арнайы жүлде тігіп, үздік қақпашы атанған Ерлан Нихимбаевқа, үздік шабуылшы Тамирлан Қажмұхамет және үздік қорғаушы Бауыржан Бейсембаев сынды ойыншыларға сый-сияпат жасады.
Абай ЕРТІС, Семей
Суретті түсірген автор
